පට්ටපල්, අමුලික ඇත්ත කෙටි කතා මාලාවේ.... එක

හැදින්වීම .

   මේ මැලේසියාවේ රැකියාවට එන බොහෝ දෙනා දැන් කියන්නේ අපි ආවේ මේ වෙන දේවල් මෙලෝ දෙයක් දැනගෙන නෙවිනේ (ආ මෙයාලා බාබාලා) දන්නවනම් කීයටවත් එන්නේ නෑ (ඉතින් දැන් දන්නවනේ අපහු පලයල්ලකෝ)  කියලා තමයි. බලාගෙන ගියාම අම්මා පස්සෙන් ඇවිත් බැට් එකෙන් ගගහා එලවපු නිසා තමයි කට්ටිය මෙහෙ ඇවිත් දුක්විඳගෙන ජොබ් කරන්නේ....

   එත් ඉඳලා හිටලා රාළට හම්බවෙලා තියෙනවා තම කැමැත්තෙන්ම ඇවිත් ආපහු යන්නෙත් නැතිව ජොබ කරන කට්ටියව.... ඒ අයගෙන්  ගොඩක් දෙනක් ඇවිත් අපහු නොගිහින් මෙහෙ ඉන්නේ අලි අලි චෝයි වැඩ අර (අම්මට)සිරි ලංකාවේදී වෙලාතියෙන නිසා. අන්න ඒ චෝයි වැඩ වෙච්චා අයගේ කතා සිරිස් එකක් සරින් සැරේ මම ඔන්න කට්ටියත් එක්ක බෙදා ගන්න තමයි ලැහැස්ති වෙන්නේ අද පළමු පියවරට පළමු කතාව මේ මම වන මැරකාකා (මැලේ රාළ කතා කාරයා ) ලියයි 

එකේ එක . මේසන් සාන්ත .

   සාන්ත තාත්තා එක්ක මේසන් වැඩට අත් උදව් දෙන්න ගිහින් තියෙන්නේ ඉස්කෝලේ අට පාස් කරපු කාලේ ඉඳන්මයි.... කාලයත් සමග තම බාසුන්නැහෙගෙන් කිසිදු ගුරුමුෂ්ටියක් නැතුව මේසන් කරුමාන්තය ඉගෙන ගත්ත සාන්ත, හැමදාමත් අත් උදව් කරුවෙක් පමණක් වෙච්ච තම පියාටත් නොලද හැකි තරමේ වැටුපක් ලබා ගන්න සමත් උනේ යන්තම් අවූරුදු විස්සක් වෙනකොටම වගේමයි... 

   කලින් වැඩ කරපු තැන්වල අය සාන්තවම තම ඊළඟ වැඩේට ඉල්ලගෙන එනකොට ලොකුබාසුත් තම ගෝලයා ගැන හොඳ පැහැදීමෙන් තමයි හිටියේ. කාලය වේගයෙන් ගලා යන කොට අල්ලපු ගමේන් සාන්තිව හොයාගත් සාන්ත ලොකු මගුලක් කන්නේ නැතිව හඳපානෙම  සාන්තිව කැන්දාගෙන ආවා. 

    කාලයාගේ ඈවෑමෙන් දැන් සාන්ත තනිවම කොන්තරාත් ගන්න මේසන් බාසෙක්....  යන්න  එන්න අරගන්නවා තඩි තැපැල් නයින්ටි බයික් එකක් රිකොන්ඩිසන්ම...
     ලොකු දුවට අවූරුදු හතක්  වෙන කොට පොඩි දුවට අවූරුදු පහක්.... පරිස්සමින් ඉතිරි කරගත් මුදලින් තම ශිල්පය මොනවට විදහා පාමින් ඊළඟ අව්රුද්දක වාගේ කාලයක් ඇතුලත් මෙන්න සාන්ත හදනවා දකින එව්වන්ට ඉරිසියාවේ පැලෙන තත්වයේ තට්ටු එකාහාමාරක ගෙයක්.... 

  දැන් ඊළඟට සාන්ති බලන් ඉන්නවා ලොකුදුව ගහෙන් වැටෙනකම්....
ඒ ආරංචිය සාන්තට ආවේ ටිකක් විතර දුරක නගරයේ  අලුත් කොන්තරාත්තුවක් ගන්න කතා කර කර ඉන්න කොටමයි. කොන්තාරාත්තුවටත් හොඳ වට්ටමක් දිලා රුපියල් පනස්දාහක අත්තිකාරම් චෙක් එකත් රැගෙන සාන්ත කෙලින්ම ගියේ ඒ නගරයේ බැංකුවට...

    විනාඩි කීපයකදී චෙක් එක මුදල් බවට හරවා ගෙන ඊළඟට සාන්ත යනවා ඒ ලඟම තිබ්බ මුස්ලිම් රෙදි සාප්පු තුනම පහු කරගෙන සිංහල මුදලාලිගේ රෙදි සාප්පුවට... පව්ලේ සැමට උත්සවයකට අවශ්‍ය රෙදි මිලට ගෙන රුපියල් 17000ක බිල ගෙවන්නේ එවෙලාවේ බැංකුවෙන් හම්බ උන දාහේ කොළ  පනහෙන් 17ක් දීලයි....

  ඔන්න දැන් තමයි කතාව පටන් ගන්නේ.....

දාහෙකොල 17 අතට ගත්ත මුදලාලියා උඩම තිබ්බ කොළ හතර සාන්තට පෙන්නලා අහනවා මොන කන්තොරුවෙන්ද මේවා අච්චුගැහැව්වේ කියලා  ඒ කතාවෙන් අන්දුන්කුන්දුන් වෙන සාන්ත කියනවා ඕවා මම හදපුවා නෙවි මේ දැන් බැංකුවෙන් ගත්තුවා කියලා.... කතාව දුර දිග යනවා තමන් කිසිම වැරදි දෙයක් නොකළ බව දන්නා සාන්ත මුදලාලි එහෙනම් පොලිසියට කතා කරනවා කිව්වම හා කියනවා 

  මේන්න බොලේ ටිකකින් පොලිසිය ඇවිදින් සාන්තව පැක් කරගන්නවා.......... හේතුව හොර රුපියල් දාහේ කොළ හතරක් මාරු කරන්න තැත් කිරීම....

  සාන්ත දන්නා ශිල්ප ඔක්කොම දාලා කියනවා මේ ඔක්කොම සල්ලි ලැබුනේ බැංකුවෙන් කියලා සාන්තවත් රැගෙන බැංකුවට යන පොලිසිය බැංකුවෙන් මේ ගැන ප්‍රකාශයක් ගන්නවා.... බැංකුව කියන්නේ අපි පනස්දාහක් දුන්නා තමයි එත් හොර සල්ලි දුන්නේ නෑ.... ඔක්කොම රජයේ ඔරිජිනල් බඩු.... එත් කඩේට යන ටිකට කොළ හතරක් හොර වෙලා .... සාන්තම පිලිගන්නවා මුදලාලි සල්ලි ලාච්චුව ලඟට ගියෙත් නෑ.. තමන් ඉස්සරහම තමන්ම දීපු සල්ලි තමයි පරික්ෂා කෙරුවේ කියලා. කොම හරි දුවගේ උත්සවයක් ලැහැස්තිකරන්න ගිය පියා එදා නවතින්නේ රහස් පොලිසියේ හතරවන තට්ටුවේ 

  රහස් පොලෝසියේ රහස් කාමරයක සාන්තගේ රහස් අවයව රහස් මේසයක රහස් ලාච්චුවකට දාලා වහන ගමන් අහනවා 
  කොහෙන්ද බෝල මේ හාර දාහ 
බැංකුවෙන් හම්බ උනේ මහත්තයෝ 
ලාච්චුව තව තදට වහන ගමන් 
  බොරු කියන්න එපා යකෝ 
ඇයි දෙයියනේ බැංකුවෙන් හම්බ වෙච්ච එක බැංකුවෙන් නැතුව මාතලන් දුන්නයි කියන්නද ? නැත්නම් සිරා දුන්නයි කියන්නද 
  ඇත්තමයි බුදු මහත්තයෝ බැංකුවෙන්මයි දුන්නේ.....


    ඔන්න ඔහොමයි එදා දවස..... එත කොට පහුව දා පත්තරවල (දිනමිණ) යනවා කලක් තිස්සේ කරගෙන ගිය මහාපරිමාණ හොර සල්ලි අච්චුගහන කල්ලියක සාමාජිකයෙක් මුදල් නෝට්ටු තොගයක් සමග පොලිස් රැහැනට.....

    ඊටත් සතියකට පස්සේ ගමේ කතා  වෙනවා..... මු මේ හරියට ඉන්න තැනක්වත් නැතුව හිටිය එකා ගැනියෙකුත් ගෙනැල්ලා, බයිසිමොටෝවකුත් අරගෙන ළමයි දෙන්නෙකුත් හදලා අච්චර පුරාජේරු ගෙයක් හැදුවේ ඔය හොර සල්ලි වලින්ම තමයිනේ බෝල ..... අනේ අපිටනම් ගෙයක් තියා ගඩොල් කැටයක් වත් එපා හොර වැඩ වලින්නම් කියලා 

   තවත් මාසයක් විතර යනකොට සාන්තට නඩු වැටෙනවා..... දිගටම ඇතුලේ මොකද හැමදාම සාන්ත කියන්නේ තමන් නිවැරදිකරු සල්ලි ලැබුනේ බැංකුවෙන් කියලා 

    සාන්ත දිගටම රිමාන්ඩ්.. නඩුව දිගටම කල් යනවා බයිසිමොටෝවෙන් පටන් ගෙන අලුතෙන් හදපු ගේ දක්වා ඔක්කොම උකස් වෙනවා නඩුවට වියදම් කරන්න..

    තවත් අවූරුද්දකට විතර පස්සේ සාන්ත වැරදිකාරයා වෙලා අවුරුදු එකාමාරකට හිරේ යනවා..... හිරෙන් නිදහස් වෙච්ච සාන්තට ගමට මුණ දෙන්න බෑ හැමෝම මේ දක්ෂ මේසන් බාස් දිහා බලන්නේ ලොකු හොරෙක් වගේ..... උකස් කාරයටම ගේ විකුණුව සාන්ත පිටපලාතක සාන්තිවයි දරු දෙන්නවයි නවත්තලා මැලේසියාවට කැමැත්තේන්ම  එන්නේ ඔන්න ඔහොමයි.....

පලි: මේ කතාව රාළට කිව්ව සාන්තගෙන් රාල ඇහැව්වේ ප්‍රශ්න දෙකයි. 
ඔයාට හොඳටම සුවර්ද කොළ හතර දුන්නේ බැංකුවෙන් කියලා ?? මුදලාලි මාරුකරා වෙන්න බැරිද??
මට හොඳටම විශ්වාසයි මුදලාලි මාරු කරේනම් නෑ උඩම තිබ්බ කොළ හතර මම දීපු  ගමන්මයි මිනිහා වෙන් කරේ හොර සල්ලි කියලා....
හැබැයි මම අර මුස්ලිම් කඩේකට ගිහින් ඕක උනානම් තාමත් මම ලංකාවේ ඒ මිනිස්සු අපේ තත්ත්වය තේරුම් අරගෙන පොලිසි නොගිහින් ඕක ගොඩින් බේරලා දෙනවා.......  
සාන්ත හිරේ ඉඳන් ආවාට පස්සේ අයෙත් පුරුදු විදියට රස්සාව කරන්න බැලුවේ නැද්ද 
මොකද නැත්තේ....... අපේ ගම්වල එකෙක්වත් මට වැඩක් දුන්නේ නෑ අමාරුවෙන් පිට ගමක තාප්පයක් ගහන වැඩක් හොයා ගත්තා එකටවත් ගම පළාතේ එකෙක්වත් අත්උදව්වට ආවේ නෑ..... කොම හරි පිට මිනිස්සු වගයක් එක්ක දවස් දෙක තුනයි  වැඩේ කරගෙන යන්න උනේ අපේ ගමේ එවුන් එතන අයිති කාරයට හොයාගෙනම ඇවිත් කියලා පහුගිය දේවල් බොරුත් එකතුකරලා.... අර මනුස්සයා  ඒ වැඩෙත් නවත්තන්න කිවා....

අනේ අම්මේ කොමද දැනෙන සනීපෙ අපේ මේ සිංහල කම ගැන ???

මැරකාකා ලියයි .....................